Postu Administrativu Ermera Vila Hetan informasaun Lei hosi DNDHC MJ

Versão para impressão

Ermera Vila - Ministeriu Justisa (MJ) liu husi Diresaun Nasional Direitus Umanus no Sidadania (DNDHC) disemina informasaun lei (Krime Eleitoral, Falsifikasaun Dokumentus, Lei Kontra Violensia Domestika Prosedimentu Hato’o Keixa, Direitu Vitima/Lezadu no Direitu Suspeitu/Arguido) hala’o iha salaun Suku Poetete, Postu Administrasaun Ermera Vila, Munsipiu Ermera, loron 19 Outubru 2016.

Disemina informasaun lei importante hodi hasa’e kuiñesimentu sidadaun hodi kontribui ba prosesu judisiariu iha ita rain. Enkuandu konsensia sidadaun as, hatene prevene krime no hatene mekanismu ka prosesual lei nian implika mós sidadaun sira hakmatek ba moris di’ak, justisa no paz. Ho ejijensia ida ne’e, DNDHC MJ mantein hala’o nia papel divulga lei sira tuir planu ne’ebé iha.

Reprezentante Diretór DNDHC, Helder Gaudinho Martins hatete, “objetivu prinsipal ami mai ne’e hodi divulga informasaun lei, nune’e reforsa kuiñesimentu komunidade, nune’e ses hosi krime sira hanesan krime eleitorál, falsifikasaun dokumentus, lei kontra violensia domestika, nomos presija hatene prosedimentu lei nian.”
“Hau orgulhu no fó obrigado barak ba Ministeriu Justisa ne’ebé hili ita nia teritoriu ne’e hodi hala’o programa divulgasaun lei, ita tau importansia ba aktividade ne’e tamba haforsa ita nia abilidade ba lei nian, nune’e ita hatene no do’ok hosi krime sira ne’ebé sira sei esplika.” Dehan, Aministrador Postu Ermera Vila, Fernando Soares, iha abertura sesaun ne’e, Kuarta (19/10/2016).
Iha materia ha’at ne’ebé disemina mak hanesan, Lei kontra Violensia Domestika hato’o hosi Tekniku Superior DNDHC, Celito Cardoso, Krime Eleitorál no Falsifikasaun Dokumentus hato’o hosi, Sefi Departementu DNAJL, Pascoal da Costa Soares. Ba materia ikus, Prosedimentu Hato’o Keixa, Direitu Vitima/Lezadu no Direitu Suspeitu/Arguidu hato’o hosi Tekniku Superior DNDHC, Carmelindo da Silva Caetano.

Iha sesaun husu no hatan komunidade husu barak liu mak kona-ba falsifikasaun dokumentus, tuir mai prosesu hato’o keixa nomos lei kontra violensia domestika no krime eleitoral. Komunidade Ermera vila rekomenda ba MJ para divulga kona-ba lei rai nian iha futuru tamba problema rai mós barak. Sira mensiona katak programa divulgasaun se bele ba suku sira izoladu para aumenta komunidade nia kuiñesimentu ba lei.

Sesaun ne’e hetan partisipasaun masimu hosi administrador postu inklui ninia elementu balun, Reprezentante Diretór DNDHC, Sefi Departemetu hosi DNAJL, Sefi Departementu Divulgasaun DNDHC, Komandante eskuadra PNTL Ermera Vila, Sefi Suku no Sefi Aldeia, Lia Nain, Juventude, Madre, Presidente Veteranus Ermera vila ho nia membrus balun no Komunidade bai-bain, Funsionariu, Estudante no Professor sira. (C).

Carmelindo da Silva Caetano
Tekniku Superior, DNDHC/MJ