LEI KOMBATE TRÁFIKU ILÍSITU DROGA OHIN PASSA TIHA ONA IHA PLENÁRIA PARLAMENTU NASIONÁL

PN, MJ – S.E. Ministru Justisa Ivo Valente iha loron Tersa-Feira (18/10/2016) iha Parlamentu Nasionál (PN) informa katak, Proposta Projetu Lei N.º 27/III/3ª, Lei kona-ba Kombate Tráfiku Ilísitu Droga iha diskusaun espesialidade ne’ebé aprezenta hosi Governu, liu hosi Ministériu Justisa passa tiha ona ho votu 35 deputados, laiha vota kontra no abstensaun votu ida de’it.

Proposta Lei Kombate Tráfiku Ilísitu Droga iha diskusaun espesialidade ba daruak nian iha plenária, prezide hosi Prezidente Ezersísiu PN, Vise-Prezidente Eduardo de Deus Barreto no hetan prezensa hosi membru PN hamutuk kuaze 36 deputados.

Proposta lei ida ne’e hodi hatu’ur ordenamentu jurídiku internu iha domíniu atu prevene no kombate hahalok krimi droga. Lei ne’e mós sei autoriza autoridade judisiáriu sira hodi hatu’ur medidas investigasaun kriminál ida ne’ebé di’ak, no aplika pena no kastigu ba autór krimi sira.

Aliénde ne’e, kestaun lubuk-ida mós mosu iha diskusaun plenária PN, deputadu sira preokupa ho moldura pena ne’ebé mak sei kma’an ba autór sira (produtór no distributór), inklui medidas no aplikasaun pena ba konsumidór ilísitu droga. Deputados sira, halo duni alterasaun balun ba proposta lei ne’e, hadia moldura pena, hasa’e pena bót ba autór no konsumidór hodi nune’e iha medidas forte hodi kombate krimi droga iha Timor-Leste.

“Maske iha diskusaun ne’ebé maka’as tebes no halo votasaun por artigu, maibé tuku 09:05 iha kalan ida ne’e, deputados sira konsege aprova lei importante ida tán ba Timor-Leste hodi prevene no kombate krimi droga,” dehan Ministru Ivo Valente bainhira hákotu nia intervensaun iha plenária Parlamentu Nasionál.

Dezenvolvimentu lei ne’e reflete aplikasaun konvensaun internasional nian, Konvensaun Nasões Unidas kona-ba kontra Tráfiku Ilísitu ba Estupefasiente no Substánsia Psikotrópika ne’ebé mak Estadu Timor-Leste ratifika tiha ona. Timor-Leste nia relatóriu no performance sei di’ak liután iha Organização Nasões Unidas (ONU) nia oin.

Akompaña Ministru Ivo Valente iha diskusaun plenária ne’e mak; Diretór Diresaun Nasionál Assessoria Jurídiku no Lejislasaun (DNAJL) Sr. Nelinho Vital, assessor jurídiku sira no tékniku lejizlasaun DNAJL nian.

Maria de Lourdes Xavier Lin
Media Officer
Gabinete Ministru Justisa