FINLÂNDIA NO SUÉSIA – S.E. Ministru Justisa Ivo Valente no nia-ekipa tékniku sira hosi loron 12 – 15 fulan-Outubru tinan 2016 hala’o inspesaun ofisiál hodi verifika impressaun página de dados no kardeneta Passaporte Eletrônico Timor-Leste (PETL) iha fábrika Gemalto Oy iha Kapitál Finlândia, Helsinki, no kontinua ba iha Kapitál Suésia, Stockholm.

Verifikasaun impressaun passaporte eletrônico (E-Passport) iha fábrika Gemalto Oy nian ne’e, aliénde atu observa kualidade passaporte, buka hatene mós progressu dezenvolvimentu software ne’ebé seguru no autentika, sustentável no oinsá proteje página de dados (datapage) uzuáriu nian hodi hare’e mós produsaun kardenete passaporte eletrônico.

Prosesu verifikasaun ba produsaun datapage no kardenta passaporte nian, hahú ho diskusaun no verifikasaun ba dezeñu no konteúdu tipos passaporte sira ne’ebé aprova tuir decreto-lei alterasaun ba Passaporte Eletróniku TL nian. Depois ne’e, Ministru Ivo Valente hare’e besik no halo inspesaun ba fluxu produsaun apartir hosi prosesu dezeñu no layout iha Estudio Gemalto, kontinua hare’e produsaun surat tahan, plástiku, teste ba planta impressaun nian, mákina produsaun, produsaun kardenete, packing, transportasaun no seluk-seluk tán.

Tuir planu, iha fulan-Dezembru tinan 2016, Ministériu Justisa sei simu espécime ezemplu kardeneta PETL hamutuk 200, kardeneta ho tipos-hát mak hanesan; diplomata, kómun, servisu no estranjeiru hodi halo teste ba aplikasaun uzu.

Relasaun ho emisaun passaporte foun ba Timor-Leste, Ministru Ivo Valente informa katak, iha tempu badak ne’e, kompañia no Governu sei kompleta funsionamentu produsaun no halo lansamentu emisaun kardeneta passaporte eletrônico hamutuk 13,800 iha tinan oin, iha fulan-Abril 2017.

Akompaña Ministru Ivo Valente iha prosesu verifikasaun impressaun data page passaporte mak; Diretór-Jerál Ministériu Justisa Sr. Henrique de Oliveira Ximenes, Diretór Rejistu Notariadu Sr. Vitór da Costa, Diretór DNAJL Sr. Nelinho Vital, Diretór DNAF Sr. Crisogno da Costa Neto, Funsionária Asuntu Jurídika MNEK Sra. Fenícia Michella F. C. Amaral, Tékniku IT hosi Ajénsia Dezenvolvimentu Nasionál (ADN) Sr. Romaldo Duarte Guterres no tékniku sira hosi Diresaun Nasionál Rejistu Notariadu (DNRN).

Solange Pires
GMJ - Gabinete Ministru Justisa