REJIME FOUN BA PASSAPORTE ELETRÓNIKU TIMOR-LESTE APROVA ONA IHA KONSELLU MINISTRU

DÍLI, KM – S.E. Ministru Justisa Ivo Valente halo aprezentasaun Rejime Foun ba Passaporte Eletróniku Timor-Leste iha Konsellu Ministru, no rezultadu diskusaun ba Rejime Passaporte Eletróniku aprova hosi Konsellu Ministru iha Pálasiu Governu, Díli, loron Kuarta-Feira (05/10/2016).

Decreto-Lei kona-ba Novo Regime de Passaporte Eletrônica de Timor-Leste (PETL) ne’e hodi revoga Decreto Lei no. 44/2008 kona-ba Regime do Passaporte.

Iha ninia intervensaun, Ministru Ivo Valelente hateten katak, “to’o ona tempu ba Timor-Leste atu moderniza nia-sistema passaporte tuir padraun internasionál no mós prátika komum ne’ebé hala’o iha nasaun sira seluk. Passaporte foun ne’ebe hanaran Passaporte Eletrónika Timor-Leste, PETL ne’e sei uza sistema modernu no dadus pesoál sei tau iha microchip nia laran, hanesan padraun ne’ebé hatu’ur ona hosi International Civil Aviation Organization (ICAO).”

“Passaporte eletróniku atu fasilita Timor-oan sira nia viajem seguru liu no fásil liu tan, no proposta ida ne’e, mai ho forma ida ne’ebé kompletu atu regula kona-ba klasifikasaun passaporte, karakterístika modelu tuir Timor-Leste nia sócio-geográfica, titular ba passaporte, rekizitus atu hetan passaporte, validasaun passaporte, sansaun ba utilizasaun la tuir lei, no mós provizaun tranzitóriu ho durasaun tinan-ida nia laran,” esplika Ministru Ivo Valente.

Durante diskusaun, hetan reasaun pozitivu hosi membru Governu sira ne’ebé hatudu liu hosi diskusaun ida naruk no klean antes halo aprovasaun.
Diskusaun iha ámbitu oinsá halo komparasaun ho passaporte agora, sei iha diferensia lubuk ida mak hanesan; passaporte agora aumenta nia pájina to’o 50 folhas, diferénsa kór, no mós rekizitus ne’ebé atu trata passaporte mak Bilhete Identidade (BI).

Tuir planu, passaporte foun, passaporte eletróniku sei emite no utiliza hosi Timor-oan sira komesa loron 01 abril 2017.

Iha aprezentasaun ne’e, partisipa mós Diretór DNAJL Sr. Nelinho Vital, Diretor DNRN Sr. Vitór da Costa Neto, tékniku hosi DNRN no assessor jurídiku sira.


Nelinho Vital
Diretór Nasionál DNAJL
Ministériu Justisa