MINISTRU IVO VALENTE HALA’O REUNIAUN HO ONG BELUN IHA GABINETE MINISTRU JUSTISA

DÍLI, GMJ – S.E. Ministru Justisa Ivo Valente hala’o reuniaun ho Organizasaun Naun-Governamentál (ONG) Belun iha Gabinete Ministru Justisa (GMJ), Díli, loron Kinta-Feira (29/09/2016).

Reuniaun ne’e atu rona no fahe informasaun entre ONG Belun ho Ministériu Justisa oinsá mak hari’i páz no estabilidade iha sosiedade nia le’et. Aliénde ne’e, rona mós informasaun hosi ONG Belun kona-ba situasaun konflitu no violénsia ne’ebé ho intensidade sa’e tanba disputa rai no konflitu arte marsiais nian, monitorizasaun eleisaun jerál, no seluk-seluk tán.

Iha ninia lian makloke, Ministru Ivo Valente agradese no apresia servisu ONG Belun, tanba hanesan sosiedade sívil ajuda ona Governu iha asuntu prevensaun konflitu iha sosiedade nia le’et.

“Ha’u apresia tebes ho ONG Beleun nia servisu, ita-bót sira kontinua hala’o servisu di’ak no besik komunidade sira, presiza asosia ita-bót sira nia án ho ita-nia sosiedade iha ámbitu dezenvolvimentu sosiál, ekonomia no hametin páz,” enkoraja Ministru Ivo Valente.

Iha sorin seluk, Diretór Luís Ximenes esplika mós kona-ba kooperasaun ONG Belun ho Terras Propriedades nível munisípiu relasaun ho mediasaun disputa rai entre komunidade sira, funsionamentu rede prevensaun konflitu no Rede ba Rai. Aliénde ne’e, koalia mós fatór sira ne’ebé potensialmente kontribui ba konflitu iha komunidade.

Diskusaun iha ámbitu vise-versa ne’e la’o di’ak, tanba parte-rua promete atu kolabora no apoiu malu. Hafoin remata reuniaun e’en, Ministru Ivo Valente promete atu kontinua fahe informasaun ba malun, Governu no ONG sira, tanba dezenvolvimentu paíz ne’e presiza konta mós partisipasaun hosi sosiedade sívil nian.

Partisipa iha reuniaun ne’e mak; Diretór ONG Belun Luis Ximenes, Xéfi Programa Early Warning and Early Response System Marilia Oliveira da Costa, Media and Communication Specialist Viriato Pereira, Program Adviser Zach Abugov no Assessor Gabinete Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa