SETP Hala’o Konsulta Públika ba Komunidade Afetadu Portu Tibar

TIBAR -Sekretáriu Estadu Terras Propriedades (SETP) Jaime Xavier Lopes hamutuk ho ministru Obras Publika inklui mós Vise Ministru Finansas iha loron 19 fulan-Setembru 2016 foin lalais ne’e hala’o konsulta públiku ho komunidade afetadu portu Tibar.

Iha konsulta publika ba komunidade afetadu ne’e Jaime hateten, hanesan sidadaun ne’ebé mak di’ak tenki fó sira nia kontribuisaun ba iha prosesu dezenvolvimentu ne’ebé maka atu la’o iha Nasaun Timór Leste.

Jaime hateteten,Prosesu levantamentu dadus ba rai nian komesa hala’o ona iha tinan 2014. Nune’e mós dadus ba komunidade afetadu sira hahuu foti ona iha momentu ne’ebá.

Tuir Jaime kontribuisaun komunidade sira nian iha area afetadu ba dezenvolvimentu mkaas tebes, tanba durante levantamentu to’o loron determina seidauk iha ema ruma mak halo reklamasaun ba iha fatin ne’ebé mak iha futuru mai sei harii portu tibar.

Tanba ne’e Jaime husu ba komunidade sira hodi bele fó nafatin sira nia kontribuisaun ba iha prosesu dezenvolvimentu.

“Posesu dezenvolvimentu ba ita nia nasaun Timor-Leste ne’e atu la’o ba oin ami sira tuur iha governu ne’e mesak deit labele halo buat ida, tanba ne’e husu ita hotu nia hamutuk ho ita hotu nia kolaborasaun hodi bele dudu dezenvolvimentu ne’e ba oin,” tenik Jaime.

Tuir Jaime, dalaruma komunidade sira hanoin katak, dezenvolvimentu sira ne’ebé mak halo ne’e tanba membru governu sira nia karak, maibé ne’e lae, tanba planu governu ho estadu ida ne’e nian oinsá mak bele kria dezenvolvimentu ida ne’ebé maka bele hasai ninia sidadaun sira hosi kiak no mukit.

“Ha’u husu ba entidade hotu atu bele fó sira nai kontribuisaun ba iha dezenvolvimentu, nune’e ha’u mós hakarak, atu fo hatene ba maluk afetadu sira katak, iha futuru mai imi sei la lakon imi nia fatin tanba estadu liu hosi terras propriedades prepara ona fatin ba komunidade afetadu sira iha area ulmera nian.” dehan Jaime.

Iha konstula Públika ne’ebé maka hala’o iha Postu Tibar ne’e Vise Ministru Finansas, Helder Lopes hateten, Planu asaun ba realokasaun konaba dezenvolvimentu portu Tibar ne’e tanba liuona hosi planu dezenvolvimentu ba iha nasaun nian, tanba ne’e governu deside hodi halo portu internasionál hodi bele fasilita ró-ahi boot sira ne’ebé maka dalabark para iha portu Díli ho tempu ne’ebé mak kleur.

Helder esplika mós katak, kontratu ba prosesu konstrusaun portu Tibar nian Estadu Timór-Leste hala’o ona kontratu ho Kompana iha loron 13 fulan-Juñu 2016 fulan hirak ba kotuk.

Nia saliemnta mós katak, hanesan nasaun Timor-Leste mós presiza halo portu internasionál ida hodi bele dezenvolve setór ekonomia.

Vise Ministru ne’e hateten, efeitus multifikaltivu maka sei fó benefisiu ekonómiku nune’e mós sei fó benefisiu sosiál liu-liu ba iha komunidade sira ne’ebé maka hela besik iha portu.

Iha fatin hanesan Ministru Obras Publika, Gastão Francisco de Sousa hateten, bainhira atu komesa dezenvolvimentu ruma sempre iha ninia inpaktu, maibé importante mak ikus-mai bele fó benefisiu ba iha komunidade sira no mós futuru nasaun nian.

Tanba ne’e Gastão mós husu kolaborasaun komunidade sira nian hodi bele hala’o portu ne’e ho susesu, tanba kontratu hala’o ona no hetan ona ninia desizaun iha tribunál de kontas.*

Ananias Babo Horta
Media Officer SETP