SEKRETÁRIU Estadu Terras Propriedades (SETP) Jaime Xavier Lopes iha loron 21 fulan-Setembru 2016 foin-lalais ne’e hala’o enkontru ho Komandante PNTL Komisaria Julio da Costa Hornai ho nia estrutura tomak PNTL nian inklui mós Komunidade afetadu ba alargamentu Kuartél Jerál PNTL nian ne’ebé maka iha futuru sei alrga iha Caicoli Díli.

Iha enkontru ne’ebé preside hosi Komandante Polisia Nasionál Timór-Leste (PNTL), ho nia estrutura iha sala reuniaun Kulater Jerál nian ne’e Jaime husu ba komunidade afetadu sira hodi bele iha kolaborasaun ne’ebé maka di’ak ho autoridade estadu nian hodi bele komesa ona prosesu dezenvolvimentu.

“Ha’u husu ba komunidade afetadu sira tenki kumpre desizaun hodi bele fó imi nia kontribuisaun ba iha prosesu dezenvolvimentu iha ita nia nasaun Timór-Leste, husu ba komunidade sira hodi labele impede dezenvolvimentu, tanba ne’e di’ak ba ita no mós di’ak ba ita nia nasaun.” dehan Jaime.

Jaime hateten, Alargamentu ne’e sai prekupasaun ema-hotu nian, tanba ne’e ema-hotu ho intensaun oinsa mak atu bele dezelvolve nasaun TL ne’e.

Alrgamentu ba kuartél jerál PNTL nian ne’e iha uma-kain 20 mak sai afetadu, no antes ne’e PNTL liu hosi Teras Propriedades husu ona ba iha afetadu sira hodi bele hatama sira nia konta bankaria hodi bele selu ona sira nia uma ho ai-horis sira ne’ebé maka sira kuda iha rai laran.

Maibé durante ne’e hein iha afetadu na’in rua deit maka hatama ona sira nia konta bankaria no sira nain 18 seluk seidauk bele hatama ho razaun dehan osan ne’ebé maka estadu fó kompenizasaun ninia montante ki’ik liu.

“Antes ne’e iha enkontru dahuluk ne’ebé maka hala’o iha edifisiu Terras Propriedades nian ha’u esplika ona ba komunidade sira katak, agora dadaun estadu selu deit maka uma no aihoris sira kona-ba rai seidauk bele tama iha lista hodi selu tanba lei rai seidauk iha,” dehan Jaime hodi responde komunidade sira nia prekupasaun.

Iha enkontru ne’ebé hetan partisipasaun masimu hosi lideransa komunitária Caicoli no nia xefe Aldeia inklui mós reprezentante Administradór Postu ne’e Jaime husu ba uma-kain rua ne’ebé maka hatama ona sira nia konta bankaria bele sai dadaun ona, ba afetadu selu seluk ne’ebé maka lakohi sai estadu konsidera la kopera ba iha dezenvolvimentu. hanesan estadu tenki ezekuta planu ne’ebé mak iha ona, tanba ne’e nia husu ba komunidade sira atu bele fó sira nia kolaborasaun hodi bele hala’o dezenvolvimentu.

Iha fatin hanesan Komandante Jerál PNTL Komisaria Julio da Costa Hornai hato’o ninia agradesementu ba iha SETP tanba bele partisipa iha enkontru ne’ebé maka organiza hosi kuartel Jerál ne’e hodi fahe informasaun ne’ebé maka klaru ba iha komunidade afetadu sira.

Julio hateten, hakarak ka lakohi kuartél Jerál PNTL nian tenki halo konstrusaun antes tinan ne’e hotu, tanba orsamentu ba iha alargamentu PNTL nian ne’e tenki ezekuta iha tinan ida ne’e bainhira la ezekuta estadu sei dada-fila.*