MINISTRU IVO VALENTE PREZIDE 9º REUNIAUN KONSELLU KONSULTIVU MINISTÉRIU JUSTISA IHA DÍLI

DÍLI, MJ – S.E. Ministru Justisa Ivo Valente prezide 9º Reuniaun Konsellu Konsultivu Ministériu Justisa (KKMJ) ne’ebé mak partisipa hosi dirijente ofisiais tomak iha ámbitu Ministériu Justisa iha Sala Reuniaun Ministériu Justisa, iha Díli, loron Kinta-Feira (01/09/2016).

Reuniaun KK ne’e nu’udar órgaun konsultivu ne’ebé mak regularmente hala’o fulan-fulan, no involve Diretór-Jerál, Inspetór-Jerál, Diretór Nasionál sira, no mós instituisaun sira ne’ebé tuteladu ba Ministériu Justisa. Instituisaun tutela ba Ministériu Justisa mak hanesan; Defensoria Públiku Jerál, Polísia Sientífiku Investigasaun Kriminál (PSIK) no Centro Formação Jurídica (CFJ).

Iha 9º Reuniaun KK ohin, atu aktualiza no diskute progressu implementasaun servisu kada diresaun idak-idak, no buka hatene nível ezekusaun orsamentu Ministériu Justisa to’o iha fim-de Agusto 2016. Aliénde ne’e, diskute meius propiu solusaun ba dezafiu sira ne’ebé Ministériu Justisa infrenta iha implementasaun atividade servisu, no simu mós orientasaun hosi Ministru Justisa.

Ministru Ivo Valente bainhira prezide reuniaun ida ne’e, loke oportunidade ba diresaun idak-idak no instituisaun tuteladu Ministériu Justisa nian hodi halo aprezentasaun.

Aprezentasaun hahú hosi Diretór PSIK Vicente Fernandes e Brito, esplika kona-ba investigasaun kazu omesídiu ne’ebé PSIK, inklui ho ninia aktu komplexidade. Nia (Diretór PSIK) mós informa kona-ba investigadór PSIK nian ne’ebé tuir hela dadaun formasaun espesialidade nian (área espesialista) iha Portugál, formasaun investigadór iha área investigasaun krimi droga no terrorismu, no asuntu seluk-seluk tán.

Depois-de aprezentasaun hosi Diretór Vicente Fernandes, Ministru Ivo Valente loke ba diskusaun, husu mós ba membru Konsellu Konsultivu atu halo intervensaun ruma hodi fornese ideias no sujestaun konstrutivu ruma relasaun ho PSIk nia aprezentasaun.

Diskusaun vise-versa, Ministru Ivo Valente jere diskusaun ho di’ak tebes, rona sujestaun no ideias sira, no konklui atu tau iha implementasaun, katak, presiza atu materializa ideias maiz sientífiku sira iha prátika servisu loron-loron nian hodi responde intereses Estadu nian.

Konforme diskusaun durante iha prosesu reuniaun, kada diresaun aprezenta atividade no levanta obstakulu ne’ebé sira hasoru. Ministru Ivo Valente dehan, “diskusaun ida ne’e di’ak tebes, sientífiku no prátiku, hanesan dirijente diresaun no líder instituisaun justisa nian tenke expressa sá ideias konstrutivu sira hodi melhora servisu loron-loron ba ita-nia povu.”

“Ha’u kontenti tebes ho reuniaun ne’e, ita-bót sira inovativu tebes, maibé presiza atu tau iha prátika, no mós kria mekanizmu rigorozu ida iha ezekusaun atividade no orsamentu ministériu nian,” hateten Ministru Ivo Valente.

Reuniaun Konsellu Konsultivu Ministériu Justisa termina iha meudia tuku 11:46 oras Timor-Leste.

Marka prezensa iha reuniaun ne’e mak; Xéfi Gabinete Ministru Justisa Evangelino Belo, Diretór PSIK Vicente Fernandes e Brito, Inspetór Jerál Lucas António da Costa, Sub-Inpetór Jaime Maia, Sub-Inspetór Antonio Fatima, Diretór DNAF Crisogno da Costa Neto, Diretór DNSPRS Helder Cosme Marçal Belo, Diretór DNHJL Nelinho Vital, Diretóra CFJ (reprezenta), Diretór DNRN Vitór da Costa Neto, Diretór DNTP-SC (reprezenta), Diretór DNDHC Flaviano Moniz Leão no Assessores Gabinete Ministru.

Maria de Lourdes Xavier Lin
Media Officer
Gabinete Ministru Justisa