MINISTRU IVO VALENTE SASIN BA SERIMÓNIA ASINATURA TERMU ASEITASAUN PROMUSAUN KAREIRRA FUNSIONÁRIU PÚBLIKU BA MINISTÉRIU JUSTISA NIAN

DÍLI, CFJ – S.E. Ministru Justisa Ivo Valente ne’ebé akompañadu hosi Sekretáriu Estadu Terras no Propriedade Sr. Jaime Xavier Lopes no Komisária Funsaun Públika Sra. Maria 'Micato' Domingas Alves sai sasin ba asinatura Termu Aseitasaun promusaun kareirra ba funsionáriu públiku Ministériu Justisa nian hamutuk funsionáriu 78 iha Aula Konferénsia Centro Formação Jurídica (CFJ), Díli, loron Sexta-Feira (19/08/2016).

Asina termu aseitasaun ne’e nu’udar prosedimentu administrativu ba rezultadu rekrutamentu konkursu internál nian ne’ebé mak Ministériu Justisa hala’o tuir delegasaun kompeténsia ne’ebé deposita hosi Komisaun Funsaun Públiku (KFP) atu implementa rasik.

Ho ida ne’e, Ministériu Justisa estabelese Ekipa Juri tuir prinsípiu objetividade no imparsialidade bazeia ba iha avaliasaun dezempeñu servisu funsionáriu públiku ne’ebé mak tuir konkursu, aliénde ne’e, hala’o mós ijame eskrita no intrevista.

Ministru Ivo Valente iha ninia intervensaun hateten, “eventu ohin ne’e importante tebes ba ita-bót sira, importante mós ba Ministériu Justisa, tanba nia funsionáriu públiku di’ak sira hetan promusaun iha ninia kareirra. Ne’e hatudu katak, Governu rekoñese nia funsionáriu públiku sira, maske sei infenta kestaun lubuk ida, ita sei falta rekursu umanus no fasilidades hodi hala’o imi-nia kna’ar.”

“Ita-bót sira ne’e hamutuk funsionáriu 78 mak sei asina termu aseitasaun ba promusaun nian, ha’u hakarak dehan ba imi, ita-bót sira ema importante iha Ministériu Justisa tanba liu ona prosesu lubuk ida, povu hein hela imi-nia espíritu atu servi, hanesan ha’u dehan beibeik ba imi, avaliasaun laós mai hosi imi-nia superiór de’it, maibé importante liu mak mai hosi ita-nia komunidade sira,” hateten Ministru Ivo Valente.

Ministru Ivo Valente haktuir liután kona-ba importánsia inovasaun funsionáriu públiku nian ba iha atendimentu públiku, servisu nian hodi servi ho profesionál no imparsiál nafatin, fó nafatin apoiu tomak ba iha interese Estadu nian, interese Estadu nian mak interese povu hotu-hotu, dalan mak hala’o kna’ar ho di’ak no metin iha responsabilidade.

Iha sorin seluk, Komisária Funsaun Públika Sra. Maria 'Micato' Domingas Alves ne’ebé mak hola fatin ba sasin asinatura termu aseitasaun dehan katak, “ha’u mai ne’e atu reprezenta Prezidente Komisaun Funsaun Públiku hodi hato’o parabéns ba funsionáriu públiku Ministériu Justisa ne’ebé mak hetan ona promusaun kareirra, sa’e grau, ne’e funsionáriu públiku nia direitu atu hetan duni, aliénde ne’e, atu hadia kareirra no bem-star funsionáriu sira.”

Komisária KFP ne’ebé famozu ho naran bolu ‘Mana Micato’ ne’e, husu ba funsionáriu públiku sira atu prontu kolokadu iha fatin ne’ebé de’it, tanba foti opsaun sai funsionáriu públiku sei tau ás liu interese Estadu nian do que interese partidaria, án no família. Nia mós apela atu servisu ho disiplina, badinas no iha integridade; labele ejiji mak direitu de’it, maibé tenke hala’o mós dever.

Iha sorin seluk, Komisária Micato informa mós kona-ba nia-vizita ba iha Prizaun Becora. Iha vizita ne’e, kestaun lubun ida mak Guarda Prizionál sira ijiji, relasaun ho implementasaun sira-nia rejime espesiál. Aliénde ne’e, nia informa mós kona-ba akizasaun ba sidadania Timor-Leste ba profesores balun ne’ebé kaben ho Timor-oan no hala’o kna’ar kleur tebes maibé seidauk hetan sidadania.

Hanesan responsável tékniku administrativu, serimónia ne’e organiza hosi Gabinete Diretór-Jerál Ministériu Justisa.

Iha nia-introdusaun, Diretór-Jerál Henrique de Oliveira Ximenes relata kona-ba prosesu levantamentu dadus tuir despaixu Ministru Justisa, rezultadu avaliasaun, prosedimentu rekrutamentu liu hosi konkursu internu, prosesu estabelesimentu ekipa juri no rezultadu avalisaun nian.

“Depoiz-de halo levantamentu dadus ba funsionáriu públiku Ministériu Justisa, ami halo kedan avaliasaun ba funsionáriu sira hosi tinan 2013 hosi Grau A – F, nune’e, prepara prosedimentu termu referénsia, hari’i ekipa juri no hala’o konkorsu internu,” esplika Diretór-Jerál Henrique de Oliveira Ximenes.

Diretór-Jerál Henrique mós hato’o nia-agradesimentu no obrigadu ba Komisaun Funsaun Públiku ne’ebé mak deposita fiar no kompeténsia ba Ministériu Justisa hodi hala’o konkursu internál.

Marka prezensa iha asinatura termu aseitasaun funsionáriu Ministériu Justisa ne’e mak; Diretór-Jerál Ministériu Justisa Henrique de Oliveira Ximenes, Defensór Públiku-Jerál Sergio de Jesus Hornai, Diretór PSIK Vicente Fernandes e Brito, Diretora CFJ Marcelina Tilman da Silva, Inspetór-Jerál GIA Lucas António da Costa, Diretora Nasionál Rekursu Umanus Komisaun Funsaun Públika, Xéfi Gabinete Ministru Justisa Evangelino Belo, Xéfi Gabinete SETP, dirijente ofisiais nasionál no munisípiu sira, no assessor sira iha ámbitu Ministériu Justisa.

Maria de Lourdes Xavier Lin
Media Officer
Gabinete Ministru Justisa