MINISTRU IVO VALENTE PREZIDE 8º REUNIAUN REGULÁR KONSELLU KONSULTIVU MINISTÉRIU JUSTISA IHA DÍLI

DÍLI, MJ – S.E. Ministru Justisa Ivo Valente Prezide 8º Reuniaun Regulár Konsellu Konsultivu Ministériu Justisa hodi diskute atividades sira tuir Planu Asaun Anuál (PAA) 2017 ne’ebé seidauk iha finansiamentu, no mós progresu ezekusaun atividades no orsamentu Tinan Sívil 2016 nian iha Sala Reuniaun Ministériu Justisa, Díli, loron Kinta-Feira (18/08/2016).

Reuniaun ne’ebé involve dirijente Gabinete Diretór-Jerál, Gabinete Inspesaun no Auditoria (GIA), Defensoria Públiku-Jerál, Polísia Sientifíku Investigasaun Kriminál (PSIK), Centro Formação Jurídica (CFJ) no Diresaun Nasionál sira iha ámbitu Ministériu Justisa hodi aprezenta dezafiu sira ne’ebé mak diresaun sira sei hasoru dadaun, no buka hamutuk meius própiu hodi solusiona.

Iha nia intervensaun, Ministru Ivo Valente hateten, “ita-bót sira hateten mai ha’u kona-ba sá planu prioridades ne’ebé mak seidauk hetan finansiamentu, ka sei kuran, no tenke aprezenta nia fundamentu, tanbasá mak sei falta no sé la finansia karik planu refere nia implikasaun “saída” ba iha funsionamentu instituisaun nian.”

“Atu nune’e, bainhira ha’u aprezenta iha Komisaun Revizaun Orsamentu ba Tinan Sívil 2017 ho razões akuntável – bele responsabiliza, nune’e ita bele submete proposta adisionál fundamentu ida no importante tebes atu lori ba tetu orsamentu nian,” esplika Ministru Ivo Valente.

Depois-de introdusaun, Ministru Ivo Valente fó tempu ba Diretór-Jeral Henrique de Oliveira Ximenes atu halo apresiasaun ba ajenda diskusaun, no mostra ninia ponto-de-vista ba prosesu preparasaun no submisaun proposta PAA 2017 ne’ebé agora dadaun iha Komisaun Revizaun Orsamentu.

Iha biban ne’e, Diretór DNSPRS Helder Cosme Marçal Belo aprezenta kona-ba númeru prizionéiru sira, hahan no apoiu lojístiku, inkluindu nia finansiamentu ne’ebé presiza hetan fundu adisionál. Parte seluk, mobilizasaun prizionéiru balun ba iha prizaun foun Suai bainhira prizaun remata, no falta moru liur prizaun nian, eletrisidade no importansia hari’i rezidénsia ba Guarda Prizionál iha Suai.

Defensoria Públiku-Jerál Sergio de Jesus Hornai no Diretór DNAJL Nelinho Vital aprezenta kona-ba konferénsia sira em relasaun ho Timor-Leste nu’udar Prezidensia Ministru Justisa CPLP nian.

Sorin seluk, Diretora CFJ Marcelina Tilman da Silva ko’alia mós kona-ba kestaun Estatuto Centro Formação Jurídica ne’ebé halo ona alterasaun no aprova, nune’e, presiza atu implementa no ajusta iha Planu Asaun Anuál 2017 nian.

Ministru Ivo Valente dehan, “presiza tebes atu aprezenta por kazu urjente, aserta prioridade sira ho didi’ak, ida ne’ebé mak prioridade liu, tanba planu 2017 nian nu’udar kontinuasaun hosi aktividades tinan 2016 no iha posibilidade katak iha tinan 2017, Governu foun mai ne’e sei laiha Orsamentu Rektifikativu.”

Tanba-ne’e, Ministru Ivo Valente husu ba diresaun sira ne’ebé presiza iha fundu adisionál atu prepara planu no deskreve razões fundamentál ne’ebé aliña ho prioridade sira mak tenke hala’o iha tinan 2017.

Hafoin diskusaun ba PAA 2017, Ministru Ivo Valente fó oportunidade ba Diretór DNAF Crisogno da Costa Neto hodi aprezenta progresu ezekusaun orsamentu tinan 2016. Progresu ezekusaun orsamentu tuir Diretór DNAF nia aprezentasaun katak, ezekusaun Ministériu Justisa iha situasaun seguru, no ezekusaun orsamentu atinzi ona 53% em atuál no komprimissu.

Partisipa iha 8º Reuniaun Konsellu Konsultivu ne’e mak; Diretór-Jerál Henrique de Oliveira Ximenes, Xéfi Gabinete Ministru Justisa Evangelino Belo, Defensór Públiku-Jerál Sergio de Jesus Hornai, Inspetór GIA Lucas António da Costa, Diretór DNSPRS Helder Cosme Marçal Belo, Diretór DNAJL Nelinho Vital, Reprezentante Diretór PSIK Serpa Freitas, Diretóra CFJ Marcelina Tilman da Silva, Diretór DNRN Vitor da Costa Neto, Diretór DNAF Crisogno da Costa Neto, Diretór DNTP-SC Romão Guterres, Xéfi Departementu Divulgasaun DNDHC José Paulino Dias Ximenes no Assessor Gabinete Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa