MINISTRU IVO VALENTE TUIR REUNIAUN PRIMEIRU KOMITÉ PILOTÁJEM PROJETU APOIU KONSOLIDASAUN ESTADU DIREITU PALOP NO TIMOR-LESTE IHA LISBOA

LISBOA, PORTUGÁL – S.E. Ministru Justisa RDTL Ivo Valente tuir reuniaun Primeiru Pilotájem Países Africanos de Língua Oficial Portuguesa (PALOP) no Timor-Leste hodi diskute Projetu Apoiu Konsolidasaun Estadu Direitu (PACED) iha Lisboa, Portugál, loron Kinta-Feira (23/06/2016).

Reuniaun ne’ebé partisipa hosi Ministru Justisa sira, inkluindu Komisáriu Komisaun Anti Korrupsaun no Dirijente Banku Sentral sira mai hosi Timor-Leste, Portugál, Angola, Guiné-Bissau, Cabo Verde, Moçambique no São Tomé e Príncipe atu halo planu hamutuk hodi melhora kapasidade paíz membru PALOP nian, nune’e mós atu prevene no luta hasoru korrupsaun, brankeamentu kapitál, krimi organizadu no buka rezolusaun ba krimi tráfiku sira.

Diskusaun iha ámbitu amizável tebes. Hafoin análize no halo diagnóstika, paíz idak-idak halo apresiasaun no aprova planu globál servisu bi-anuál ba períodu tinan 2016 – 2017.

Planu bi-anuál PALOP no Timor-Leste ne’ebé hetan apoiu hosi Uniaun Europeia liu hosi Camões – Instituto da Cooperação e da Lingua Portugál foka liubá oinsá melhora kuadru jurídika hodi regula organizasaun administrativa, no moderniza tuir prátika internasional nian. Aliénde ne’e, reuniaun mós konsege aprova planu oinsá hasa’e kapasidade institusionál no rekursu umanus paíz membru hodi haforsa prosedimentu operasionál, no mós dezenvolve kooperasaun no kolaborasaun paíz sira iha ámbitu PALOP no Timor-Leste ho organizasaun externa no internasionál sira.

Akompaña Ministru Ivo Valente iha reuniaun ne’e mak; Komisáriu Komisaun Anti Korrupsaun (KAK) Aderito António Tilman, Diretór Ezekutivu Unidade Informasaun Finanseira Banco Central Timor-Leste (BCTL) Maria José Sarmento, Xéfi Gabinete Ministru Justisa Evangelino Belo, Juíz Administradór Tribunál Dili Duarte Tilman, Assessor Jurídiku Gabinete Ministru Justisa João Pedro Campos no Assessor Komunikasaun Sosiál Gabinete Ministru Justisa Joaozito Viana.

VIZITA MINISTRU IVO VALENTE BA NOTÁRIU ESTAJIÁRIU TIMOR-LESTE IHA INSTITUTO DOS REGISTOS E DO NOTARIADO IHA PORTUGÁL

Durante nia vizita servisu iha Lisboa Portugál, S.E. Ministru Justisa Ivo Valente mós halo vizita ba notáriu estajiáriu Timor-Leste ne’ebé mak tuir hela estájiu iha Instituto dos Registos e do Notariado (IRN) Ministériu Justisa Portugál nian iha Lisboa, Portugál, loron Kuarta-Feira (22/06/2016).

Vizita Ministru Justisa Timor-Leste iha IRN Portugál ne’e, atu hare’e besik situasaun estajiáriu sira, rona mós jestór IRN sira kona-ba saída de’it mak notáriu estajiáriu sira aprende, no sá dezafiu mak sira hasoru dadaun.

Ministru Ivo Valente depois de vizita informa katak, “notáriu estajiáriu sira sei tuir estájiu durante fulan-hát nia laran, sira aprende dadaun rejistu notariadu, kazamentu sívil, rejistu komérsiu no halo prátika iha notáriu privada iha Lisboa, Portugál.”

“Programa estájiu ne’ebé mak hala’o hosi Ministériu Justisa ida ne’e, hetan apoiu hosi Fundu Dezenvolvimentu Kapitál Umanu (FDCH),” dehan Ministru Ivo Valente.

Akompaña Ministru Justisa iha vizita ne’e, Embaixadora Timor-Leste iha Portugál Sra. Maria Filomena Paixão no Xéfi Gabinete Ministru Justisa Sr. Evangelino Belo.

Evangelino Belo
Xéfi Gabinete Ministru Justisa
Ministériu Justisa