MINISTRU IVO VALENTE APREZENTA PROPOSTA PAKÓTE LEI RAI IHA KONSELLU MINISTRU

Versão para impressão

DILI, KM – S.E. Ministru Justisa Ivo Valente halo aprezentasaun Pakóte Lei Bens Imôveis (Pakóte Lei Rai) iha Reuniaun Konsellu Ministru (KM), iha Díli loron Tersa-Feira Ohin (29/03).

Diskusaun Pakóte Lei Rai kompostu hosi: (1) Rejime Espesiál kona-ba Definisaun Titularidade Bens Imôveis, (2) Lei Expropriasaun kona-ba prosedimentu administrativu hodi halo expropriasaun bens imôveis ba utilidade públiku, no (3) Fundu Finanseiru Imobiliáriu kona-ba orsamentu no Jestaun finanseira imobiliáriu.

Depois-de reuniaun Konsellu Ministru, Ministru Justisa informa ba Mídia Gabinete Ministru katak, “Konsellu Ministru ohin aprova ona Rejime Espesiál kona-ba Definisaun Titularidade Bens Imôveis, no halo adaptasaun balun em relasaun ho Kapítulu Despeju Administrativu nian.”

“Konsellu Ministru deside atu hasai Kapítulu Despeju Administrativu iha proposta lei ida ne’e, no sei halo diploma ministeriál ketak ida ba despeju administrativu nian,” hateten Ministru Ivo.

Ohin, proposta Pakóte Lei Rai ida passa tiha ona, no diskusaun ba proposta Lei Expropriasaun no Lei Fundu Finanseiru Imobiliáriu tuir ordem do dia sei diskuti iha Konsellu Ministru iha loron Sexta-Feira (01/04), semana ida ne’e nia laran.

Ministru Ivo hateten liután, “pakóte lei sira ne’e importante tebes hodi klarifika di’ak liután situasaun jurídika kona-ba nain ba rai iha Timor-Leste no torna efetivu dimensaun oin-oin direitu propriedade privada nian, tanba-ne’e, Konsellu Ministru tau ba prioridade hodi diskute no sei aprova, ha’u espera katak Pakóte Lei Rai ne’e sei aprova mós iha Parlamentu Nasionál iha tinan ida ne’e nia laran.”

Akompaña Ministru Justisa iha aprezentasaun pakóte lei ne’e mak; Sekretáriu Estadu Terras no Propriedade Jaime Xavier Lopes, Direitór DNAJL Nelinho Vital, Diretór DNTP-SC Romão Guterres, Assessora Jurídika Patricia Coutinho no Assessór Jurídiku Terras e Propriedades Daniel Freitas.

Maria de Lourdes Xavier Lin
Media Officer

Gabinete Ministru Justisa